أقول في نفسي وأنا أعايد الناس
متى بشوفك تكمل افراح عيدي
أجامل وربي عليمٍ بالاحساس
وشهو شعوري وانت عني بعيدي
إلى خذاني لك على السهر هوجاس
ما كني إلا وسط ربعي وحيدي
لو حسوا بما بي يقولون لا باس
بدال قولة عل عيدك سعيدي
لا صرت عندي وقتي اعياد واعراس
حتى ولو في وسط سجن الحديدي
لو دلني عن ليلة القدر نوماس
والله ما اطلب غير شوفك مزيدي
عاشرت خلان وتخالطت بأجناس
ما احدٍ سواك اهديته القلب بيدي
من تحت ما طا الرجل ليا هامة الراس
كلش هويته فيك والله شهيدي
لقيت بك ذوقي وأنا قاطع الياس
ومعك ابتدا يحيى الامل من جديدي
