في دربكم يا راحلين منا كيف
تالي ليالي القيظ وأول خريفه
ردو سلام أهل القلوب المواليف
على الوليف اللي نشد عن وليفه
ردوه لعذوق النخيل المهانيف
وعلى القصور اللي بوادي حنيفه
دارٍ لها بالقلب عشق وتكاليف
يا عل عينٍ ما هوتها كفيفه
طبنا وشبنا واتعبتنا المشاريف
والمرقب العالي هبوبه عنيفه
يا واردين العد كفوا المغاريف
اللي بقى دمعٍ همامجٍ ذريفه
والله لو دمي يغيث الملاهيف
قطعت عرقي لين يصفى نزيفه
يا حظ من لا عرف منهو ولا شيف
إن طاب يحمد وان تردى بكيفه
وحنا ورثنا العز عظم وغضاريف
لا ما ورثنا العز تاج وقطيفه
