يا الله يا منشي هماليل الامطار
محيي هشيم القاع بأرض الجزيرة
يا عالم ما تحت غبات الابحار
إلهنا اللي عالم بالسريرة
انك تكافينا صواديف الاقدار
وتعز حكام علينا سهيره
ومن بعدها باكتب حسينات الاشعار
من هاجس للقاف ما يستعيره
يا مملكتنا بالتقدم والاطوار
صارت رياضك للثقافة سفيره
يا العاصمة يا اللي غنيه بالآثار
تاريخ وامجاد علينا كثيره
ديرة هل العوجاء طويلين الاشبار
حكامنا مثل السيوف الشطيره
عمار يا دار الثقافة والافكار
واللي رفع برياضنا فعل أميره
يا بوفهد مبروك يا نسل الاحرار
دارك رقت بالمجد في كل ديره
سلمان دايم للمهمات صبار
يبني مشاريع البلد وتعميره
في ظل حكم الفهد للفهد خير مدرار
مطبق للشرع منهج وسيره
وحنا حماة للوطن درع وستار
من طمع فينا راجع بالكسيره
الله يكافي المملكة كيد الاشرار
الحاسدين أهل الوجيه الشريرة
وختامها صلوا على الهادي البار
شفيع الامة يوم تبلى السريره
