يا الله ترى النفس منهية وماموره

عجزت عن ودها وأزريت لا أفطمها

غنّا العتيبي من الاحساس وشعوره

مثايل من جديد القول ناظمها

قالوا تغني طرب يا زيد في الكوره

قلت المشاعر يجي شيٍّ يداهمها

تقودني للطرب فرسان مشهوره

تضرب على كايد الصلفة وتلطمها

لا والله ألا رفعتوا كاس أخو نوره

اللي رفع سنة إمحمد وحكّمها

لعل روحه من الايمان مسروره

في رحمة الواحد الرحمن يرحمها

كاس المؤسس ظفر به فارس الدوره

زعيمها اللي على غيره تزعمها

من بحر جده يحدِّه راس تنوره

ومن الشمال لجنوب الدار رايمها

الفارس اللي سطع بالمملكة نوره

وعلى الرياض العزيزة طوق معصمها

الجرح ماله حشا يا كود دكتوره

وما للجروح الدمية غير بلسمها

عطيتكم عن زعيم الأندية صوره

لأجل الذي ما فهمها اليوم يفهمها

وباقي الشبيبة لهم بالمعترك ثوره

كل النوادي خذت بالعز مقسمها

تمّت وياالله بستر الحال والعوره

وحياتنا بأحسن الأعمال يختمها