البارحة ما هملج الطرف بنعاس

ما فاض من نجم عيوني تخيله

لا باس ياعيني على السهر لا باس

على وليفٍ فات ما القى مثيله

عنا قطع شوف المواصل له ارماس

ولا في يدي من ناعس الطرف حيله

فيما مضى ياخذ جوابي من الراس

واليوم لا عاني وانا ما اعني له

العشرة اللي ما توثق على ساس

تطيح لو صارت حصون طويله

ياونتي منها المعاليق يبّاس

صبري قضى ما باقي الا قليله

صبرت صبر صابني منه وسواس

صبر له النفس العزيزة ذليلة

على وليف حال من دونه الياس

والياس طب للقلوب العليلة

من يتبع المقفي مرده بالافلاس

مثل الذي بالقيظ يدفق صميله

هذي دروب الحب جده ودرّاس

الله يمضيها بستر وجميلة

موفق للخير ياظبي الاطعاس

لا تحسب الدنيا باهلها طويلة

الصاحب الغالي تحطه على الراس

واللي يودك لا تدور بديله

صلاة ربي عد ما هب نسناس

على نبي وضح الله دليله