دخيل خل النار بالقسي واللين
ضوح الخيال اللي تطافح ربابه
من يوم بيع الهيل بميه وعشرين
عقب الغلا ما احلى شراه وشرابه
والله لو ناخذ به العشر وعشرين
ما اقول غلى الهيل وشنب بغابه
اليا دلبحوا خطوى الرجال البخيلين
نشريه يوم ان المراوي يهابه
واحذر من المسمار لو هو بقرشين
والرزق عند اللي يصرف سحابه
تر الدلال لهن حقوق وقوانين
ومن حطهن يصبر على طق بابه
تكميلهن جدع السفر للمواعين
ضحك الحجاج وللمسير هلابه
ومن عقبه اوصيك في حفظك الدين
واتبع اللي ارسل بطاهر كتابه
واوصيك عن رفقة سراد السفاهين
اللي مماشيهم تجيب الخيابه
تر الرجال تميز الزين والشين
وكل على قدره تفصل ثيابه
عقولهم عقب المناظر موازين
جيل كسب مدح وجيل سبابه
هذي وصاتي دون بيع وتثامين
ظنيت بك والظن فيما هقابه
الطبعة الاولى