يكتبها: قصّاد

لامتى والمحبة عيب مدري حرام لامتى والحمام يموت خوف وحذر

مهدي بن سعيد

ما هي بذنب ولاعيب يابن الكرام المحبه فخر والكره اساس (القذر)

* * *

حضرة الشاعر بدون المبادىء وش يكون كافر يخدع هل الدين باسم ديانته

عواد بن طواله

كلنا لولا مبادي عقيدتنا نهون ومن يحاول يخدع الناس يلقي جنايته

* * *

ترى حظي وعدني بك ولكن اعرفه كذاب وعد واخلف وعاهدني وخان وطاح من عيني

عبدالواحد الزهراني

نعرف الحظ ما يوعد يجي صدفه بدون حساب وعدك الظن (غير) الحظ وافرق بين الاثنيني

* * *

لكن حرام أجرح شعورك على شان ارضي غرور اللي بدربي لمحني

عبدالله بن حجاب

لو كل ما تلمح تحبه يالانسان اصبح طريق الحب والود محني

* * *

لي صاحب صبيت دمي له فكوب كبه وهو يضحك وانا هناك منصاب

بدر الحمد

يضحك على اللي يحسب الدم مشروب جب له عصير او شيء يشرب بالاكواب

* * *

ما تشرفني عدواتكم ترى ما انتم بضدي ضد كلمة ناجحه ضد الخطوط المستقيمه

بنت أبوها

دام دربك مستقيم امشيه مايهم التحدي ما يحارب غير ناجح , وأفهميهم يا فهيمه