وين الوفا,, والّا وعودك سواليف
وين الغلا,, ياداله عن غيابي
كيف الرجا عندي غدا بالصواديف
ياكودها تنهي بشوفك عذابي
ياغالي,, اذكر غلا قلب مريف
داراك,, واسال قلبك اللي درى بي
جتك العواطف منه من غير تزييف
صريحةٍ تشكي حنين لجابي
يارب لاتواخذ قلوب المواليف
عز الله ان الشك كنه بدابي
كل مركبٍ تايه بدون المجاديف
ويبّس عروق القلب قل الشرابي
ياويل من ينقل هروج التحاريف
تجيه لابد الهوايل صعابي
ياظالمي شفت العنى والتكاليف
ادري طبوعك هي سبب كل مابي
ما احب انا والله طبع التصانيف
إلى متى تعتب عليّ من عتابي
المشكلة وشلون ابنساك,, ياكيف؟؟
وان مات شوقي,, الغلا لك حيابي
