ها الدار أمّ وتحت أقدامها الجنّة

كذا غلاها بعقلي وإن تصورته

مشاعري قبل أقوله بي يقولنّه

عن ما نبض خافقي في صوتي أظهرته

أبرها بالمحبة، وأشكي الونّه

في حزنها والفرح والروح خاشرته

أغلا المصالح قصيدي ما يسوقنّه

من شان مطلب غرض بالشعر صورته

اللي يظن بغلايه خائبٍ ظنّه

في حب داري أقول أكيد ما شرته

يزعل ويرضى ويموت وعد ماكنّه

كم حاقدٍ مملكتنا بطيبها إقهرته

أحبها, أحبها داري بلا منّه

لوبي عضو كرها كان غيّرته

أستأصله من غلاها بقطع ما حنّه

ما شكي وجع علّه من شانها أهدرته

بقيادة اللي عساهن ما ينوحنّه

سود ملكهن غلاه بطيب إشجرته

في عين من خصها بالهدى والسنّه

تحيا أبلادي بعين الله جيّرته

بسم الذي في غاية الجود جواد

سميت به والوذ به واستجيره

يا مملكتنا يا عسى العيد ينعاد

واهني جموع الحجيج الغفيره

لجل الوطن للشعر برقٍ ورعاد

يبرق ورعاد القصايد هديره

حب الوطن للشعر مصدر وميراد

كم هاجسٍ حب الوطن يستثيره

يا أغلى الديار يزيد عمري ويزداد

حبك بلاه الزود يا أعز ديره

بينك وبين أزكى النبيين ميعاد

اختارك الله للهدى والبصيره

يا مولد التاريخ هجري وميلاد

أنتي له أصل وفصل أرض الجزيره

يا جود حاتم يا قصيد ابن شداد

يا الشافعي ياالحنبلي ياالمغيره

ياالترمذي يالبيهقي يابن مقداد

يازيد يا ابن العاص يا ابوهريره

ياالعاربه يالعين يالغين يالصاد

يا طهر هاجر ياالنسك يا الشعيره

يا شجرة آل سعود يالملح والزاد

يا قبلة المليار مالك نظيره

يا قدوة العالم قريبين وبعاد

دولة تحل المشكلات العسيره

أنتي سعوديه على المنهج الجاد

وانتي مناخ الحق وانتي نصيره

مبنى البطل ما اهتز ساسه ولاناد

الله يعز مكملين المسيره

آل السعود إذا نشدً كل نشاد

أسره بحب العالم أجمع جديره

المملكة غصبٍ على كل حساد

من رادها بالسو يلقى مصيره

وصلاة ربي عد ما غرّ عداد

على رسول ما اتشفع بغيره

لا ,, ما يشرفني كتابة قصيده

في موطني,, لا صرت ماني موفي

أما تكون أفكار شعري جديده

وإلا عسى يارب تنشل كفي

مهما كتبت أبيات شعرٍ عديده

لا,, لا ورب الكون لا ماتكفي

واللي خلقني بين باقي عبيده

حب الوطن هو كل ذوقي وشفي

روحي بنظم القاف لجله سعيده

وما به بوسط القلب شي متخفي

وان ما قريت القاف هذا بجريده

من ساحة الشعار بسحب ملفي