بديت باسمك يا ارحم الراحمينا
يامنزل التوبة وعم ولقمان
نشكي عليك ولا لغيرك شكينا
واللي شكا لله فلا هوب خسران
يا الله عن بعض العباد اتحمينا
اللي غدوا لبليس ربع وخلان
بعض البشر ياناس فيهم بلينا
بعض حقد والبعض بالدين عدونا
عبر الفضائيات نسمع طنينا
حرب على الإسلام ياناس واعلان
حطوا برامجهم وفيها بلينا
مزاعم من دون حق وبرهان
الحسد يدفعهم وحقد دفينا
وسمومهم جتنا لها اشكال والوان
حنا على نهج الشريعة مشينا
ماهمنا لو يهرج فلان وفلان
حنا لنا الاسلام منهج ودينا
سمحه تعاليمه وهو خير الاديان
بالمصطفى خير البشر مقتدينا
مادام قدوتكم تشرشل ودايان
انتم تبون انكرم المفسدينا
تخسون ياعبادة اصنام واوثان
ان كان هذا قصدكم ضايعينا
حنا تعاهدنا علىخمس الاركان
حنا بشرع الله وحكمه مضينا
واللي يعاندنا نقول انت غلطان
وان كان طبقنا الحدود اهتدينا
للمنهج اللي نازل فيه قرآن
اللي قتل يقتل وقطع اليمينا
للسارق اللي صار للغير خوان
وحد الحرابة سيف املح سنينا
يفصل حدود الراس عن حد الامتان
هذي حدود الله وحنا قرينا
آياته وفيها عذاب وغفران
وانتم ترى زمرة ابليس اللعينا
ياللي تبون الحكم فينا لشيطان
عن غيرنا وش علمكم ساكتينا
اللي بفلسطين استبدوا ولبنان
لاتحسبون انا بكم جاهلينا
وحنانشوف اللي حصل بارض شيشان
لاتدعون ان حق الانسان صينا
وشعوب باكملها تشرد وتنهان
كل التهم واللي تقولون فينا
كذب واباطيل وزور وبهتان
ياللي تقولون اننا ظالمينا
وشلون يظلم من حكم شرع رحمن
الظلم فيكم وانتم التايهينا
للتفرقة تمشون في كل ميدان
واللي تبعكم من عربنا الحزينا
امنافق غطى على قلبه الران
الحق لاهل الحق دايم يبينا
والجور لاهل الجور منهج وعنوان
مافيه يوم قيل عنا اعتدينا
مضرب مثل با لأمن من بين الاوطان
اللي يبي حكم العدالة يجينا
يلقي المعزة بين صحب وجيران
واللي يبي درب الفساد المشينا
ذنبه على جنبه ولوكان ماكان
حكامنا آل سعود فيهم رضينا
منالهم طاعة على مر الازمان
حكامنا نرخص لهم مالدينا
والروح نرخصها لهم دون تثمان
حكامنا في حكمهم عادلينا
في عدلهم نلقى المبرة والاحسان
الله يبقيهم لنا مابقينا
والله يسلطهم على كل فسقان
مادام ابو فيصل يقود السفينا
حنابخير ودارنا دار الامان
سياسي محنك وعقله رزينا
حلال صعبات المشاكل كحيلان
يفتل وينقض وان فتل مايلينا
فعله تبين يوم وجه الدهر شان
وعضيد ابو فيصل كريم امينا
هذاك ابو متعب كما البدر لابان
ريف الضعوف ومامن الخايفينا
وكنه على كبد العدو سم ثعبان
والنايب الثاني ندي اليدينا
هودرعنا الضافي وللحق سلطان
واختامها واعداد وبل الغشينا
صلوا على المختار من نسل عدنان
