يالله ياللي تعلم السر والغيب
ياعالمٍ كل الخفاء والسريه
ياللي بقدره تطلع الشمس وتغيب
الكون واللي فيه بأمرك تديره
جبار ما يكسر طيب الاطابيب
محي العظام الباليات الكسيرة
ادعيك يالمعبود توف المطاليب
اللي على عبدك صعابٍ كثيرة
الجهد كل ولحيتي كلها شيب
والماء جذب عن زرع عبدك حفيره
إنك تمد اللي فضا عنده الجيب
من جزل مداتٍ لعبدك يسيره
اللي لقلت عليه الأصاحيب
من سوء غبرات الليالي تجيره
قامت تواردني سوات المشاهيب
ومدات غيرك للموارد قصيرة
قام الثعل يارد مثل مارد الذيب
ياكل عشا سرحان والاخشيره
يمناه تقصر ما يسد المواجيب
يسعى على غرات بوقة قطيره
اللي على شرب المناقع محاديب
لو شاف بعيونه قليل البصيرة
تغفر خطاي ودعوتي يالله تجيب
رزاق طيرٍ طار رزقه مطيره
