دمعة من مقلة العين مفضوحه

تكشف أسرار المحبة وخافيها

حولت مع كلمة جات مبحوحه

ليتني مشيت قدام لا اوحيها

الموادع صعب والكبد مجروحه

راح ما يدري عن الكبد وش فيها

الحسوفه كان هالروحه الروحه

روحة اللي قبلها العام كانيها

عن عموم الخلق الأسرار مكبوحه

بين جدران الضلوع ومحانيها

ما بقي غير الحق النوحه النوحه

مير ما تشفي غليلي واسويها

شاعر ما بين أوصاف ممدوحه

ليه يشقى بالقصيده ويبنيها

عاشق عيطا من البيض مملوحه

جوهرة والجوهرة كيف أبا اشريها

من شعاع الشمس ومن القمر ضوحه

ومن ظلام الليل الأمتان يكسيها

اسود ما شافته عين مشفوحه

من كرم ربي عليها معافيها

لك شهادة حق ماهي بمقدوحه

انك اللي يسلب القلب طاريها

يا عنود الصيد ما أنتي بمسموحه

كان حاضر عشرتك غير ماضيها

ويش ذنب اللي بليتيه في روحه

لين نادى له قبايل باساميها

لا تحدينه على غير مصلوحه

غلطة ماهي بسيطة تلافيها

ارجعي,, لك كل الأبواب مفتوحه

وادخلي,, ثم كل الأبواب صكيها