السهر صار من ضمن البلاوي

أشغل العين ماهي مستريحه

والشعر يوم حارنّ الشكاوي

قام يشعل بهوجاسي قديحه

الهوى اليوم بدروبه ملاوي

ضيّع الحلم وعهودٍ صريحه

أصبح الصدق والكذب متساوي

فيه والطيّبه صارت قبيحه

الوفاء عشعشت فيه الحكاوي

والعطا ملّ من دنياً شحيحه

خابت النخوة وكل الهقاوي

بالليالي وأنا نفسي جريحه

وأنت ياللي قصرت عن الحراوي

لاتعذّر معاذيرٍ مليحه

وش تفيد السوالف والرجاوي

وأنت خالفت الاعراف الصحيحه

أبعد أكثر,, مثل بعض المناوي

وانس الأحلام وآمالٍ سميحه

واعتبرها صبا جهل وسلاوي

واّلا أنا باعتبرها ألف طيحه