حائل من الغيره تعاني وتنخاك
تصرخ بعالي الصوت حييت ياسعود
تقول جاراتي تطاولن الأفلاك
وإلا فانا حتى أبسط الشيء محدود
ياموزع الثروة فضايل عطاياك
شرق وغرب ومن جنوب بلا حدود
وحائل ترجى الجود من جود يمناك
ما تبغي إلا المثل ياباذل الجود
أجا وسلمى كل صبح ترجاك
ياميرنا ماضيك بالفعل مشهود
حققت في مكة من الفعل ميزاك
يشهد لك التاريخ والفعل موجود
والطيب أخذته وأنت ياشيخ بصباك
متوارثه يامير من خال وجدود
عبدالعزيز الجد ياطيب منشاك
والجد الآخر، جاك بسعود وحمود
ومال الردى درب يجيلك وينصاك
ياقف على بابك ذليل ومردود
إفعل مثل ماضيك والرب يرعاك
والصبر والأقدام راعيه موعود
ونذكرك ياميرنا لاعدمناك
جدة، خذت حقه، وحائل رجا ووعود
ونبي عروس المجد تلبس حلاياك
وتباري الجارات في كل موجود
وتتيه فيما بينهن تتبع خطاك
تلعب طرب نشوانة تطلب الزود
وتقول للزوار ياضيف حياك
الباب ما تلقاه لاجيت مردود
لا رحت شرق وغرب وأجنبت بخطاك
ترى الشمال اليوم بسعود موعود
ويا زايره بالليل ياطيب ملفاك
تلقى وجيه ضاحكه تبذل الجود
وهوى عليل ينعش الروح لاجاك
يطرد هموم اللي من الصيف ملهود
ولون الذهب بجبالها الصبح يغشاك
وبطحاه ياقوت على الأرض ممدود
ونجومها بالليل يازين مسراك
متناثرات بالسماء نظم وعقود
هذي ديارك عقب جيتك تنخاك
تصرخ بعال الصوت وين أنت ياسعود
