البارحة ساهر واجر الونيني
ياكبر جرح القلب يا كبر بلواه
هلت دموع الحزن من موق عيني
وصفقت كف بكف من حر فرقاه
عليك حزني يا محمد سنيني
ابومبارك ما هقيت إني أنساه
اخوي حال الموت بينه وبيني
رحل عن الدنيا وقفت مطاياه
يوم الربوع اتلى الخبر في ظنيني
بشهر الصيام بيوم سبعة فقدناه
مرحوم يا للي بالشدايد عويني
يالله عسى في جنة الخلد مثواه
ياعل منزاله مع الصالحيني
يا رب يا معبود تمحى خطاياه
عساه يا ربي من اهل اليميني
عساه من يأخذ كتابه بيمناه
طيلة حياته مرضي الوالديني
وبالعون جاره ماشكى منه ماذاه
لو ينشرى نشريه باثمن ثميني
ولو ينفدى ياكود بالعمر نفداه
لاشك هذا اللي كتب بالجبيني
مادبر المعبود للعبد يرضاه
يا رب تجعلنا من الصابريني
واللي كتب باللوح لابد نلقاه
