ياللي نويت أمر السفر خارج الوين
وين أنت رايح يابن الأجواد غلطان
ترى الجزيرة ما بعد زينها زين
هي درة الأوطان في كل الأزمان
خل العلوم اللي بليا براهين
هذا وطنا فائقٍ كل الأوطان
رح وتمش زيارةٍ للحرمين
تكسب أجر من ربنا عالي الشان
والا على شاطي بحر جدة الزين
والا على الباحة ترى الباحة جنان
ويا مزين الطائف وذيك البساتين
تنسيك همٍ مشغل كل الأعيان
ويا زينها لو جيت هاك الضلاعين
اللي تغطيها السحايب والأمزان
ديار خالد حي ذا الراس والعين
ما كفت السودة وقرعه ورغدان
والا على الدمام وبقيق والعين
شرق الوطن تبسطك لو كنت زعلان
والا الشمال اللي له الناس جايين
ومن عاش فيه يموت ما قال طفشان
والا على نجد اللي تجيها الملايين
في مهرجانٍ جامعٍ كل الألوان
هي عاصمة كل الدول عام الألفين
للمجد وصلها الى فوق سلمان
الله يعز أبطالنا نصرة الدين
فهد وعبدالله ولا هان سلطان
