حسبت نار الوجد ساعة بكيتي

على غرام ذوبته المقادير

بيّن شقى دمعك ولو ما حكيتي

الدمع يرسم كل ما صار ويصير

يبيح باسرارك ولو ما بغيتي

ويكسر رموش المجاريح تكسير

عرفت منه جروحك اللي كميتي

الحب لازم له على الوجه تاثير

ليتك عرفتي زين يومك هويتي

طبع الهوى بين المسرّة وتكدير

يوم يبيعك خلك اللي شريتي

ويقول لك خنتيه حبيتي الغير

يبيك ترضين الذي ما جنيتي

ما عاد في قلبه للاحباب تقدير

ويوم تحقق لك حلوم رجيتي

الصبر زين ومن صبر يجني الخير

لا تحسبينك بالحياة انتهيتي

كل لقى بالحب غدر وتزوير

ما كل قلب صافي لو صفيتي

ولا تحسنين الظن من دون تفكير