هاض الفؤاد وعاود الجرح مداماه
واسترسلت بالدمع عين حزينه
والقلب يومه شاف خله وراعاه
كثرت هواجيسه وبيح كنينه
وفزو كسر بالصدر باقي حناياه
شفق على خله وشوفة ضنينه
هذي سوايا القلب هذي سواياه
ماطاعكم بالقول ياناصحينه
كم واحد في الحب سارت مطاياه
أحد يسار الدرب وأحد يمينه
وأحد عنان القلب في وسط يمناه
متمكن يقوى عليه ويهينه
لاشك قلبي ماهقيت اني اقواه
بين الرجاء والياس ضيع سنينه
يركض ورى شخص هجره وتناساه
يطرد سراب ماتطوله يدينه
الصاحب اللي كن طلعت محياه
بدر كمل في عالي الكون زينه
يجبر ثقيل العقل في المشى يتلاه
ويرسل سهام الموت من رمش عينه
وانا صويب الخد والعنق وشفاه
وليل تلاعب فوق غرة جيبنه
دفنت جرحي خايف الناس تلقاه
بس فضحت جرحي عيون حزينه
