الله لحد ياما غزينا وجينا
وياما ركبنا حاميات المشاويح
وياما على كيرانهن اعتلينا
وياما ركبناها عصير مراويح
وياما تعاطت بالهنادي يدينا
وياما تقاسمنا حلال المصاليح
وراك تزهد ياريش العين فينا
تقول خيال الحضر زين تصفيح
ترى الضفر مهوب للظاعنينا
قسم وهو بين الوجيه المفاليح
البدو واللي بالقرى نازلينا
كل عطاه الله من هبة الريح
يوم الفضول بحلتك شارعينا
والشلف باخوانك سواة الزنانيح
يوم انجمر رمحي خذيت السنينا
وادعيت عنك الخيل صم مدابيح
ياعود ريحانٍ بعرض البطينا
وامنين ماهب الهوى فاح له ريح
ونهودها اللي مالهجها الجنينا
حمر ثمرهن تجرّح الثوب تجريح
لا خوخ لا رمان لاهوب تينا
لا مشمش البصرة ولا بالتفافيح
