العيون اللي بكت موت السنافي
لو بكت طول الليالي فمعذوره
ارخصي دمع على الخدين صافي
واحرقي قلب تضايق منه زوره
الفقيده غالي ولا هو بكافي
لو كتبت من الورق واملا سطوره
كلنا عقبه على دربه مقافي
سنة في الخلق لا ساعة نشوره
وهذي الدنيا سريعة الانحرافي
كل يوم عندها للناس صوره
غير يا مرحوم ياريف الضعافي
لاشكوا شين الزمان وبان جوره
وان حصل يوم على ربعه يشافي
لا زهمته ما تباطى في حضوره
صيرمي للعدو سم زعافي
وللصديق احلى من اللي في زهوره
والحمول الكايده عنده خفافي
يرتكي لثقالها بعزمه وشوره
والكرم لا دارت سنين عجافي
موقفه لا ركّب الوقت ودهوره
وخدمة الشيبان لو يتعب عوافي
في رضاهم طايع ونفسه صبوره
يضحك حجاجه وبالاخلاق وافي
كامل الشارات وافية شبوره
سيف من يختار بالسيوف الرهافي
الخصايل كلها فيه مخبوره
انت يا سلطان يوم اللاش هافي
كنك سهيل اليماني في ظهوره
والفنا والموت هو اتلى المطافي
كل حي ينزل القبر ويزوره
