أخذت من وقتي دروس وتجاريب
وأصبحت أفكر بالليال وغثاها
ولقيت فيها امعكرين المشاريب
اللي بعيدٍ بالمشاكل مداها
دنيا تقلب صاحي الفكر تقليب
ما ينعرف وش وجهها من قفاها
كم واحدٍ رأسه تكامل به الشيب
مما يشوف من الليال وعناها
يصبر وصبره ما خفى عالم الغيب
يرجي مع اللي عند ربي رجاها
يشوف بعيونه كبار العذاريب
في عالم توذي ويكثر وذاها
أحدٍ يودي علم والثاني يجيب
ناسٍ تنم ويقطع الله نماها
واحدٍ بقلبه حب شذب العراقيب
يخطي ونفسه ما تحسب خطاها
واحدٍ يسوي للأوادم ملاعيب
ياكل حقوق الناس وأنكر شقاها
واحد استقام وماشيٍ صح وامصيب
ثم انقلب وأطلق لنفسه هواها
هذي عقوبة من كبار العواقيب
بلوى كبيرة ما يحصل ادواها
خايب ومن يمشي مثل مشيه يخيب
كيف المذلة والمهونة رضاها
ما حسب ليومٍ يبي زود تحسيب
يومٍ جميع الناس تأخذ جزاها
اما لجنة خلد وإلا لواهيب
نارٍ توقد ويتزايد لضاها
أمرين ما لحدٍ تصدد وتجنيب
أمر من الله ينكتب له حداها
يالله تبعدنا عن الشك والريب
وتهدي من اذنوبه لنفسه جناها
تجعل لنا الجنة منازل هل الطيب
هذي مناة النفس حقق امناها
