حقيقه لغزك اعجبني واقول إنه حلو مفتول

عسى ربي يوفقني واحله ياعريب الخال

اقول الساعة بوسطه عقارب ركضها معقول

تسابق داخله تركض نشوفه ياوسيع البال

هلا يا مرحباً باللي نظم لغزه بزين القول

بيوتٍ تعجب الشاعر وتعجب طيبين الفال

جوابه جاهزٍ عندي عس حلِّي يجي مقبول

هذيك الساعة بوسطه عقارب شفتها تجتال

ألا ياصاحبي لغزك عرفته مايبي له قول

ترى مضمارك الساعة وحلّي جاك يارجّال

وتمشي وسطها كلّ العقارب طول وقت الحول

تسابق داخل الساعة ولا هي لابسه لنعال

هلا باللي كتب لغز يبي له بالتراث حلول

بيوته وافية جزلة مهي كيف أنت كيف الحال

ترى (الساعة) تدور ولا تعرف المشي عرض وطول

وهذا الحل يا خالد عسى الله يصلح الأحوال

حلول اللغز يا خالد اظنه ما بهن اميول

عقب ما قام با الصفحة فطينٍ جاب له معدال

ينحي شينها عن زينها والزين اله مدلول

كما الساعات بعضه غالي و بعضه بعشر ريال

هلا يا مرحبا بك عد ما انشى وأمطر الهملول

وعدد ما هب ذعذاع الهبوب وكل غصنٍ مال

ألا يا خالد بن جريش كان العلم له مدلول

ترى المضمار للساعة ولا غيره أبد ينقال

قرينا اللغز في صفحة تراث ولغزكم معقول

ترى الميدان به ضيق وصغير وصانعه رجال

عقارب ساعة للوقت تضبط قاصره وطول

بداخل هالزجاجة تجتول في شمس وبظلال

هلا باللي كتب لغزه على ساسٍ صدر ووصول

ترى حله هو الساعة يجي مضمارها أشكال

تسابق به عقارب ما تمل من المشي وتجول

ولا تاقف ولو لحظة ولو وقّفَت شرينا ابدال

ألا يا مرحبا باللي عرفنا لغزه المجهول

وعلى خالد سلام وجاك ردي ياوسيع البال

ترى الساعة بها المضمار ما غيره يصير حلول

وعقاربها بداخلها تدور بوسطها يارجال

أنا أجاوبك يا خالد عسى حلي يجي مقبول

وغيري من يشارك بالحلول وحلها الحلال

عرفنا لغزك الساعة عقاربها بها وتجول

خذ الزبدة ومالي والسوالف لوتروح طوال

الا يامرحبا بالصاحب اللي مقصده معقول

شديد البدع بالالغاز يطرب له وسيع البال

ترى مضمارك الساعة وخذها باختصار القول

انا ان كانه صدق ظني تراها هي يارجال

قرينا اللغز يا خالد ومنا يا صلك مرسول

يجيك بحل لغزك ياوسيع المعرفة بالحال

تعين يا الجريش وشف على ساعدك له مدلول

عقارب ساعتك تركض على المضمار دون جدال

الا يا مرحبا ياللي ذكرت بلغزك المعقول

وصايف طابقت حله وميزاته على الاخيال

تراه الوقت يا خالد مثالٍ قبلنا يقول

بساعة نضبط قياسه وتعرف تحسبه أجيال

ألا يا مرحبا واهلاً هلا يا اللي بدعت القول

وجبت اللغز والفكره جديدة والبيوت ثقال

ترى عقارب الساعة على المضمار عرض وطول

تدور ومشيها من دقته تضرب به الامثال

الا يا للي كتبت اللغز لغزك بالبلد مقيول

على الساعة يثبت بالمعاني صايب الاقوال

ينادي بالخبر راع الخبر من قمه المجهول

وشد وطاب منزاله على رأس الهدف نزال

انا ابرسل لصفحات التراث الحل بالمرسول

عبر شاشة سريع الفكس ما يتعبني المرسال

نشدنا مركز التفكير وعلن علمه المنقول

يقول الحل ساعتنا الوفيه والعلوم اطوال

أنا أبقول يا خالد عسى عمرك بخير يطول

إذا كان الفكر ما خان حل اللغز يارجال

هي الساعة لها مضمار يالطيب وفيه تجول

عقاربها على طول الزمن ياطيبين الفال