قلت ما وريت واللي غير قاله
من هجوسا عبرت محد نشدها
لو دلهت مجاملة ماني بداله
امسح العبرات والاخرى بعدها
كم غنيا مات ما سره حلاله
وكم فقير صكته بقعا بيدها
غافلين ومن وطاه السير شاله
لين ياصل للقليب اللي وردها
ما يقر الوقت ميله واعتداله
والليالي ذوقت كلا نكدها
يالله اللي كل مخلوق يساله
يا ولي الخلق يا محصي عددها
ارحم اللي راح ما وادع عيا له
ما ذكر غير الصلاه اللي سجدها
والفرايض والنوافل رأس ماله
في بنوك الآخره قدمه رصدها
في حياته كاسب طيب وجماله
والقبيله حاسبينه من عمدها
مع حبال الورد واردة حباله
وسابقة للطيب سابقة بيدها
وفي مساء عشرين ما نور هلاله
ليلة بعض الخلايق ما رقدها
عقب ابو عواد كل ضاق باله
لين يذكر سنة الله ثم حمدها
يا لله انك لا تخيب من دعا له
دعوة الاجوادا جبها في وعدها
يا ولي العرش ظله في ظلاله
والجنان الخضر يسقى من بردها
والختام بذكر مبعوث الرساله
عدّ سحب سيلها يسبق رعدها
