حيّ الكتاب وحي من به عنالي
والف هلا باللي لفا به ولفّاه
قبله وانا ما ذقت غمض الليالي
وجفني جزا عن لذة النوم ما أقواه
قل لامي اللي عن حوالي تسالي
عساه في طيبا مع الحور ملفاه
ان كان رب العرش محصي الرمالي
قد اسعفن واحيان لابد ننصاه
من فوق هجن مشيهن اجتوالي
اسبق من اللي بالشواهيق مرباه
هي تحسبن لا بعدت عنها ما اسالي
وان قلبي دب الايام ينساه
حياة رب العرش محصي الرمالي
اللي جميع الخلق تمشي برجواه
ما ساعة ما به خياله قبالي
قدام وجهي كن عيني تحلاه
مير اخبرك وش مودعن عنك جالي
بلاي مما شفت بالعين واجزاه
لا حل لي عند القرابة مجالٍ
كل بدا يقرض بعرضي ويشناه
من قل ماله صار ماله مقال
ومن كثر ماله صدقوا خبث ملواه
اصبر على الشدات صبر الجمال
ولا ينفع ابن آدم حذى حوش يمناه
تبغين بالدنيا علينا ظلال
هيف ورغيف ومقعد بارد ماه
لابد من عقب القراح الزلالي
نشرب هماج الما على غير مشهاه
مير اطلبي من هو على الناس عالي
زبن الضعيف الى التجاله بشكواه
الخير اللي عالم بالحوال
يجمع بعيد الشمل من عقب فرقاه
