ابدا بذكر اللي عليه اتكالي
الخالق المعبود علام الاسرار
يا الله انا طالبك تلطف بحالي
في ساعة فيها يضيعن الابصار
اطلبك عفوك ياعظيم الجلالي
يا الله تحرمني على واهج النار
ليا امسيت في قبر وحيد لحالي
ما به صديق ولا رفيق ولا جار
وفارقت صدقاني وشدت رحالي
وقفيت عن دنيا بها ذقت الامرار
وجللت بالاكفان تحت الصلالي
بقبر هيال مظلم ما به انوار
وتبددت كل المنى والامالي
ولقيت ما قدمت انا سر واجهار
وسئلت عن ديني وعلمي ومالي
ولا عاد ينفعني جحود ولا انكار
ومنع لساني من جواب السوالي
وتكلمت جوارحي بكل ما صار
اسالك تغفر كل ما قد مضالي
وتدلني يا خالقي زين الاعذار
ويالادمي دنياك فيها ميالي
لو قرت الك ايام لابد تندار
ولابد ما تجفاك سود الليالي
وذي عادة الدنيا ولو ما لها ثار
ياما خذت من طيبين الرجالي
اللي لهم في قمة المجد تذكار
اهل الوفا والطيب واهل الكمالي
حماية التالي بعيدين الانظار
مافادهم كثر الثرى والحلالي
ولا حالة الاحذار من دون الاقدار
هذا المصير اللي اليه المآلي
ما عنه مدراج لو اتطول الاعمار
بعد الحياة الموت والبعث تالي
ثم الخلود اما بجنات او نار
وصلاة ربي عد نبت الرمالي
على النبي عدة هماليل الامطار
