سمعت الخبر واصبحت ليلي ونا سهران

جداي اتنهد واتبع الونه الونه

عزانا بابن عامر ونطلب له الغفران

على روح روحٍ طاهرة جعله الجنه

وأنا مؤمنٍ بالله وما قدر الله كان

وغصبٍ علي دموع عيني يهلنه

وياموت لو تطلب عطيتك بدال فلان

أبا أعطيك سكس وعايدي وفرعة دنه

أبا أعطيك دونه لين تسمح من الرديان

ومن طاب يسلم لين ياكل عظم سنه

وأنا ما ارخص الطيب ولو من حدى العربان

أحبه ولو ما كان مني ولا منه

وأنا يوم أحسّب ويش بقالي من الصدقان

عليك العوض ياللي لك الفضل والمنه

صديقٍ فقدته لا بخيلٍ ولا جابان

ولا يوم وجهه شان قدمي وانا كنه

صديقٍ تفرق رفقته عني الاحزان

صداقة عمر وسنين ظني على ظنه

كريمٍ يمينه تذبح الحيل والخرفان

عشى والغداء لين الليالي تعشنه

وعزانا بابن عامر عزاء متعب السلطان

ليا سلم متعب جعل الاقدار يخطنه

ما تبنى البيوت إلا على طيب العمدان

وبعض العرب لو عاش ماحدٍ سأل عنه

وابنهي مقال القيل بسم الله الرحمان

وعلى روح روحٍ طاهرة جعلها الجنه