لاح يوم الوطن والعز لاح

وكلمة الله على البيرق تلوح

يوم الاسلام يا يوم الفلاح

والوطن كل روح له تروح

فوق الايمان ركبنا السلاح

والمقابيل بالخافق تبوح

الله اكبر مثل ضرب الرماح

سيلت في خفى الباغي جروح

غنيت حبك يا وطن

ولثمت بحروفي سماك

وعشتك اكثر من زمن

وسقيت من عروقي ثراك

انت الابو وانت الولد

وانت التغرب والبلد

وانت الشدائد والرخا

أموت وتاريخك خلد

عنيت حبك يا وطن

نبعك شرابي في الحياة

يا نشوة العز وهواه

لاجلك لو كفوفي تذوب

وامشي على جمر الغضاه

غنيت حبك يا وطن

البست شعري غترة وبشت وعقال

وخليت تغريب المذاهب لغيري

في ساحتي للفكر مليون منهال

وبحري بمكنوز المعرفه غزيري

ارفع راسك انت سعودي

طيبك جاوز كل حدود

مالك مثيل بالدنيا

غيرك ينقص وانت تزود

فارس واجدادك فوارس

واصبحت لبيت الله حارس

مغروس بالمجد وغارس

في ميدان العز شهود

علمك غانم وجارك سالم

يخشى من هيبتك الظالم

راعي صمله دايم والم

سيف وقلب وفعل زنود

فهد القايد فهد الرايد

فهد الصقر الحر الصايد

والعيد بفضل الله عايد

وسعودك يا وطن سعودي

نحمد الله تعافا شيخنا

وارجهنت قلوب المسلمين

زان حاله وزانت حالنا

طاب واليوم حنا طيبين

والفرح عم كل بلادنا

والغلا يا عرب لازم يبين

يا ملكنا فدتك ارواحنا

اشهد انك على شعبك أمين

طول الايام بجهاد وعنا

جعل عمرك على الطاعة سنين

فوق الامتان ناقل حملنا

ما تراخيت يالحصن الحصين

تسهر الليل همك عزنا

تقدح الفكر والراي الرزين

واستنارت برايك دارنا

واستقامت على الدين المكين

نجد شمس العرب والجزيرة

نحمد اللي على حبك فطرنا

يا وطنا كلنا لك ذخيرة

لانوى الباغي بك الشر ثرنا

من ورا شيخ يقود المسيرة

وتحت راياته مشينا وسرنا

المليك اللي الملا تستشيره

ابو فيصل عزنا مع فخرنا

سيفنا للحق دايم نعيره

والخطر يحفل الى اقبل خطرنا

نفتخر بامجادنا بكل سيره

في مضارب بدونا وفي حضرنا

عزنا للاسلام هو غاية فخرنا

فيه سر وجودنا ونموت دونه

ارضنا ارض الذهب وانقى المذاهب

والرجال اللي عهدهم يحفظونه

هم عهدنا ما قروا التاريخ والا

قد قروا التاريخ لكن ما يبونه

الله الاول وعزك يا الوطن ثاني

لأهل الجزيرة سلام وللملك طاعة

حنا جنود الحرس للقايد الباني

رمحه,, ودرعه وكف الشيخ وذراعه

مثل السيوف البواتر وان جنى الجاني

يضرب بها ارقاب من بالدار طماعه

من بان عبدالعزيز وصبحنا باني

ما عاد نقبل ظلام الليل لو ساعه

في السلم يشهد لنا عمرا الاوطاني

وفي الحرب لا رواحنا للموت بياعه

حنا سياج الوطن عن كل عدواني

والجيش والامن ساري العز وشراعه

ارفع الراس يا الحر القطام

واكثر الحمد,, للي صانها

انت فالمجد لك راس السنام

وعزة الناس من أوطانها

انت الاول الى سل الحسام

وقالوا الخيل من فرسانها

الفخر لك ولا تسمع كلام

لا يهمك حكي عدوانها

ديرتك من عشقها ما يلام

ويغصب الله على من خانها

صرخة ذكرتك يوم واليوم موعود

لجل الوفا لراعيك موفي الوعايد

كني بوقت راح حاضر وموجود

في يوم عشاة المجد,, عله هايد

وكن المربع توه اليوم مشيود

جدران طين اطمام سقفه جرايد

قصر بنى للعدل والطيب والجود

سوره ذرى للناس وفرشه وسايد

ياللي لكم في منبر المجد محراب

نلتوه من عقب الكدر والمصايب

نلتو رفيع المجد بسيوف وحراب

وعدوانكم شافوا كثير الغلايب

بحزم ولطم فيه تقطيع الاقارب

وعزم جلاميد الصخر منه ذايب

وحرب مرير فيه تقتيل الاشناب

يقلب شعر راس الولد منه شايب

يشهد لهم بالطيب من وسط الاصلاب

والحي واللي حد رعوج النصايب

صفوة هل العوجا مهدين الاصعاب

تارد حياض الموت ورد الجلايب

مشتاق لك يا كل ما في بلادي

شوق الرياض للسيل وادي حنيفه

رغم الفراق وطول وقت البعادي

حبك يزيد ولهفتي لك عنيفه

ولهان لك وله الحضر والبوادي

لخضرة ربيع ضاحك الوجه ريفه

عطشان اشوفك مثل ما كل وادي

ثراه ظامي للحيا عقب حيفه

يا نجد لك منزل بداخل فؤادي

يشبه جبال طويق هاك المنيفه

يا ليت والله ديرتي في مرادي

أوليت قلبي دايم يطيع كيفه

لو هو بودي ما يطول ابتعادي

ليالي الفرقا تراها مخيفه

راية الاسلام بالعز منصوره

ودولة التوحيد بظلال قايدها

شرعنا الاسلام من عهد اخو نوره

البلاد اللي على الشرع وحدها

من بحر جده الى راس تنوره

ومن ورى الخرخير لطريف حددها

الامام اللي مساعيه مشكوره

سيرة المختار جاهد وجددها

بعد مية عام من وضع دستوره

كل شبل سيرة الليث جودها

يالله انك تسقي العود وقبوره

واحفظ الباقين في عز وايدها

أسرة في نصر الاسلام مشهورة

السعود الله ينصره يساعدها

يا ذري الشعب السعودي ويا سوره

الولاية والعهد لك نجددها

يالبلاد اللي على الخير مفطوره

ما احد ينكر جهودك ويجحدها

اسمها يعرف على كل معموره

حاكم كل المشاريع شيدها

نهضة بالمملكة صارت اسطورة

والمعارف صار بالعلم رايدها

المعارف اول انتاج باكورة

بصمته في كل حاجة تقلدها

في سماء مكة وطيبة طلع نوره

شامخ في خدمة الدين يجمدها

دارنا في كل الاقطار مذكورة

وكل مسلم يحترمها ويقصدها

ما أحد سوى سواته ولا دوره

سيرته بالخير كل يرددها

الفهد واخوانه الفعل والصوره

ما نحصر افعالهم لو نعددها

أمر ناشورى وراضين في شوره

ومملكتنا في ولانا نعاهدها

من نوى تخريبها تقصر شبوره

يحترق في نارنا اللي يهددها

من يجرب حربنا يقصد شعوره

والله انه لو سلم ما تعودها

هذا الوطن والعدل يلبس شعارنا

بيرق بلدنا في سما المجد خفاق

دار غدت بالدين نور ومناره

في ظلها تولد مفاهيم الاخلاق

وجهي سعودي ولكواكب مزاره

طموح جاوز بالزمن حد الآفاق

يا حظ من هو دار الامجاد داره

كل القلوب بحبها تمطر اشواق

زان القصيد وقيمت الشعر لازان

انك على اللي يعشقونه تذيعه

يقولها الي عارف كل الاوزان

نظم الشعر عنده من الله طبيعه

جال النظر والفكر في كل الاوطان

والله ما يوجد بكل الوسيعة

دولة سحابه خير واشجار امان

دوحة رخا في ظل حكوم الشريعه

اعني السعودية لها المجد عنوان

معروفة في منزلتها الرفيعة

الشعب والقادة يعلون الاركان

كل الوفاء بارض الجزيرة جميعه

ان جيت لداخل ولا الشعب فرحان

وان رحت بالراء شفتها بالطبيعة

همست كتاب للأحبة رقيقة

من خاطر يهو القصائد والاشعار

هذا الوطن للمجد وجه طريقه

واجب علينا نغرس الدرب بازهار

ذخر مشاريع الوطن بالدقيقه

كثر الدقايق عندنا انجاز واعمار

يا لله بامانك من النكبات تامنا

والدار بحماك تمنها وتامنها

لاوامر القايد الاعلى تمثلنا

ارواحنا في سبيل الله نعربنها

بقيادة الفهد شلنا الصوت وأذنا

على المنابر تلج بنا مآذنها

يا بلادي يا ملاذ المستجير

يوم اشوفك فيك شي من الخيال

جوهرة حصباك ورمالك حرير

الطبيعة صورت فيك الجمال

فيك نجد وفيك مجد وفيك خير

وفي جبال طويق للاجي ظلال

الوطن حبنا له كل يوم يزود

كل يوم نحبه ونتباها بغلاه

حبنا له كبير فوق عالي الحدود

يوم ذكراه غالي ما يقدر مداه

يوم تاريخ مجده ننثر اغلى الورود

نزرع الحب بأرضه لين عانق سماه

نفتخر به ويومه من قديم الجدود

نذكره ونتذكر شيخه اللي بناه

شيخه الصقر جاله فوق جيشه يقود

جيشه اللي سطا به وارهب الله اعداه

مرت ايام صعبة واخو نوره يذود

ما تهنا بنومه لين داره خذاه

عزنا هو وطنا دام عمر الوجود

نعشق أرضه وطينه ونتنفس هواه

جعل ربي يحرسه من عيون الحسود

جعل من جا يضره يخلف نواه

يا حبيب الشعب يا غيث الجزيرة

يا ذرى الديرة ويا محبوب اهلها

ديرتك يالشيخ ياهي منك ديره

ينبهر من شافها والا دخلها

عزها الاسلام وخلاها كبيرة

ديرة زانت وما تطلب وصلها

يا قوي العزم من جالك تجيره

لاجت الشدات ما غيرك بطلها

تنصر المظلوم لو دونه عسيره

تنقذ المقهور من خافي عللها

حنكتك يالشيخ وافعالك جديره

بالوصف والقول ما شافوا مثلها

الفهد دائم وربه له نصير

نيته لله واعماله وكلها

المواطن في البلد عينه قريره

الامن من عند خالقها شملها

ديرة آل سعود والله ما يضيره

هرجه الحساد ما وصلت املها

من تخطى شرعنا رجله كسيره

نردعه عن فعلته قبل يعملها

مرحبا بالحرف في حب الوطن

مرحبا واغلى تراحيب القصيد

يا بلاد في ذرى العليا سكن

منبع للنور والمجد التليد

هو غلاك اللي كسب روحي رهن

او دريت العمر في حبك يزيد

بانقش الشيله من حروفي لحن

كان يكفي او تبي دم الوريد

في ترابك كم لهت كفي زمن

ذكريات كنها لي يوم عيد

يا رجال الوطن غنوا ليوم الوطن

رمز عز البلاد ورمز توحيدها

اهتفوا واعزفوا لاجله على احلى لحن

ساعة والطيور تجيب اناشيدها

مملكتنا بخير ولا يجيها وهن

دامها في ذرا العوجا واليدها

في ذرا محتمين الدار سر وعلن

هم حماة الوطن في كيد اصاديرها

طيب الله ثرى من هو نجبهم ومن

اسس الملك والفتنة طوى قيدها

قام عبدالعزيز وقادها بالرسن

يوم جاها سليل المجد جاعيدها

دافن البدعه القشرا ومحي السنن

والشريعة رفع سيفه لتاييدها

يا بلادي يا سند كل العرب

يا محط انظار كل المسلمين

اسمك المنقوش بحروف الذهب

مملكتنا للفخر تستاهلين

نرقص الحرفين في شوق وطرب

بالمحبه والولاء متماسكين

لو تبين ارواحنا قلنا وجب

كلنا لك فدوة لو تطلبين

كل من ينبوعك الصافي شرب

يجذبه لك زود شوفه والحنين

والمثل يا دارنا فيك انضرب

بالكتاب وبالشريعة تحكمين

اليوم هو يوم الوطن يوم الافراح

يوم تجلى فيه معنى السعادة

يوم غلاه مداخل كل الارواح

في كل عام يزيد حبه زيادة

له قصة توجه هدفها بالامداح

متلاحم فيها الوطن والقيادة

قصة بطلها ما توقف ولا ارتاح

حتى بنى مجد الجزيرة وشادة

حر يباريه السعد وين ما راح

ان شاف طير يدرج الحوم صاده

ياما سهر لين ابلج الصبح ينباح

ما حط راسه فوق لين الوساده

واليوم صار الخير له كم مفتاح

خذنا على العالم زمام السيادة

الفكر حلق جاوز السحب يجتال

بافاق مجد ديرتي تنتمي له

صافح وهو في هالة الفخر يختال

حقايق صافي الذهن تستميله

قرا حروف جسدت صدق الافعال

بقصة كفاح اللي غزا قبل خيله

عبدالعزيز اللي بلا ند وامثاله

من فجر ميلاده لساعة رحيله

عبدالعزيز وخير ما عنه ينقال

هو معجزة جيله وما بعد جيله

سن الطفولة عاشه بعقل رجال

عن اللهو هو مات فكره تشيله

رايه براسه,, ما تردد ولا سال

وش كثر عدوانه,, وويش اتعبي له

من السيف غرب ما تسمع للاقوال

كن المسافه كلها تنطوي له

هجد,, وصابح طيبه الحال والفال

بفتح الرياض اللي بها طال ليله

وبدت زلازل تصفق الجال بالجال

واهتزت عروش باهلها ثقيله

لين احكم القبضة عقب كر وقتال

وكل تبرا من عمله وعميله

طاعوا وصارت وحدة مالها امثال

فيها الولا للدين قبل القبيله

ثم الوطن واللي لغيم الجهل زال

رفع سراج العلم واشعل فتيله