الله يعز المملكة ويحماها
اللي حمى الكعبة من ابراه والفيل
اللي بعد شن الجيوش وغزاها
سلط عليه الله بطيرا ابابيل
كانت جهل والحرب تطحن رحاها
والناس ظلوا في شتات وبهاذيل
والله رحمها باخو نوره وجاها
فوق الجياد وغيرها ضمر حيل
وما خاف من روس الأفاعي وطاها
وأصبح يحددها على الهجن والخيل
وثبت قواعدها وسيس بناها
وسلم قيادتها لروس الرياجيل
روس الملوك اللي يذري ذراها
ومذللة كل الصعيبات تذليل
وحنا سيوف ملوكنا في يداها
تضرب بنا الهامات ونشيلها شيل
نمشي ورا حكامنا ووزراها
لو انهم خاضوا بنا اليم في الليل
ونعاهد الله ما نصادق أعداها
ولا نستمع لمروجين الأقاويل
في كل يوم ودوم نعلن ولاها
ويوم الوطن نعلن ولانا بتفصيل
لام ربتنا وأرضعتنا لباها
وفيها نبتنا أجيال جيل بعد جيل
هذي مساقط روسنا في ثراها
من حكمة اللي نزل الحق تنزيل
نسعى لعزتها ونكسب رضاها
وهذا كلام الصدق ما هوب تمثيل
أرواحنا وأموالنا من فداها
ولا خسروا اللي للشهادة مقاتيل
لعلها بالسيل لين يغشاها
يمطر عليها كل ساعة هماليل
يسقي جراديح أرضها من سماها
لين الجذيب المرتفع يركبه سيل
لين ان خضرتها تغطي حصاها
وحذف الزبيدي مثل بيض الفناجيل
يضفي على صمانها ودهناها
ويجي لعشاق الزبيدي مداهيل
ما والله احلى صيفها ثم شتاها
وليا أقبل الوسمي بعد طلعة سهيل