انا وصلت ولا عليه من الغير
وعندي بشعري يا خصيمي قناعه
يكفي قصيدي رددوه الجماهير
واكبر دليل مروجين الاشاعه
انا سحايب منبعي كله الخير
متواضعه ماجيت درب الشناعه
بنت وعريبة ساس منجب مناعير
ما علموني الردى,, والقطاعه
وقفاتهم تعرف بيوم المعاسير
وتاريخهم يشهد لهم بالشجاعه
واللي تكلم ما خلق فيّ تأثير
قناعتي فوق الحكي وانطباعه
ماهمني تشليخ بعض الشواعير
ولا هزمني حربهم واندلاعه
عندي اعتباري فوق معنى الاساطير
لاحطوا,, العزه سوات البضاعه
وان عذربوا شعري لطوال المناقير
ما أثروا بي لوحكوا بالبشاعه
شعري اصل ماهو دعايه وتزوير
لادقت هجوسي كتبته بساعه
يوم ان غيري ينسبه بالدنانير
انا بدعته واعتلا في ابداعه
واليا كتبت القاف ما اسأل ولا اشير
الرأي رأيي ما استشرت الجماعه
ويكفيني اني اختصرت المشاوير
وصلت يوم الغير ما طال باعه
