الله يرحم سيد العقل والطيب
شقران ستر معكرشات الجدايل
شيخ المواقف والوفا والمواجيب
لا غلي سعر اهل الفعل والصمايل
في ساعةٍ من ولبها يسبع الذيب
رجد الخيول وحس قصف الفتايل
الى عطو عن حومة الموت تجنيب
يارد على حوض المنايا بوايل
في كل مجدٍ ضارب له مقاضيب
في جو نقعه له شهود ودلايل
متوقف اسعود له بالمجاذيب
وعبدالعزيز الخال وآف الخصايل
تخاطموه إشيوخ نجد الغواليب
كسابة الناموس في كل طايل
معتق رقابٍ للمنايا محاضيب
بالجاه والتبر الحمر والاصايل
حامي عقاب شيب المحاقيب
فج النحور معبسات الشمايل
لاجا نهار فيه الانفس محاطيب
وتشربكت ما بين عدل ومايل
فهو لها ما فيه شك ولا ريب
بالطيب والا بالرهاف السلايل
اجزم من الضرغام واقطع من الشيب
لا قيل وين اهل الوفا والفعايل
جدي الى جات الاصايل جناديب
يثني ويسطي بالسيوف الصقايل
ملاذ من لاله عضود ومعازيب
لا شاف من جور الزمان الهوايل
يرفع مقامه فوق روس المراقيب
ويخلصه من محكمات الحبايل
بالحلم ما قد خبر مثله ولا جيب
وبالعقل ربي نفله بالنفايل
في يوم تبييض الصحف بالمكاتيب
الله يبيض صفحته بالفضايل
نجاة من صكت عليه الكلاليب
وصكو عليه أهل القلوب الغلايل
يوم الرجال يدورون المكاسيب
مكاسبه رد الثنا والجمايل
ابو اليتاما بالسنين المعاضيب
ندا يمينه للعطاشا بلايل
أرث ارجال حدهم باللقا هيب
لطامه للي على الحق عايل
أفخر بهم فخر نقي من العيب
خوالي اكرام الفعل والسبايل
