يا عيوني على فكرة وش اخبار ليلي
والله اني قطوع اللي تركته لحاله
هو على خبر قلبي يوم اجيه ويجي لي
او تغير ودور غيرنا له زمالة
هو تغير او انه ما درى في رحيلي
او كتمها بقلبه كن ماني بباله
بلغيه السلام وعلميه,, بحصيلي
قولي الفا حبيبه وانشغل في دلاله
اذكر انه عزيز ودوم يذكر جميلي
واذكر اني اردد واجبي مو جماله
بس هو غاضني يوم اعترض لي سبيلي
قال اخاويك قلت ارجوك سالي وداله
قال اخاويك غصب وغصب تصبح زميلي
قلت وبراسك امش وقام وانهى جداله
اذكر اني اجي واجيب بني وهيلي
واذكر انه يجي ويجيب زاهي دلاله
اذكر اني اسافر مع هواه العليلي
مع نجومه ونوب يجيب معنا هلاله
اذكر اني ليا جهزت للشعر خيلي
قال يا الله على الميدان نطوي سهاله
كثر ماهو شرى نومي حسبته عميلي
قمت ارخص له الغفوات وارأف بحاله
واذكر اني قبل فرقاه جففت سيلي
قلت بعد اذنك الخفاق ضيفه عناله
قال من علمك رديت قلبي دليلي
قال ياالله سلام وراح يسحب ظلاله
قالوا انك ظلمته قلت هذا شليلي
غير من زلة طافت بدافع جهاله
ما تلاقيت انا وياه من جا خليلي
شكله ايّس من العجمي ودور بداله
