اشري وأبيع ومكسبي راس مالي

ولاابغى الفوايد يا ولد كان حسبت

اجاوب الورقا بروس الطوالي

شرقت مع زين المثايل وغربت

جري لحونك يا حمامة ولالي

ماغير انا وانتي والأحزان والكبت

فكرت باول وقتنا والتوالي

وانداش فكري من غثا الوقت وانصبت

ياالقرم تشكي جور حمل الليالي

وانته شباب وصاحي الفكر ما عبت

وجسمك نحل وتقول ياهم لالي

وانت تشكوى للنشاما ولا تبت

واتهز راسك وانت داله وسالي

والعمر روح بين الاثنين والسبت

تبي النصيحة كب عنك الهبالي

والهرج ما به فايدة كان ما اصبت

وان ما مشيت بشبتك بالعدالي

ما ينفعك كتر النصايح ليا شبت

وان كان ما شلت الحمول الثقالي

ما احد حسب لك كانك اقبلت وان غبت

ولا ترتجي خمة ضعوف هزالي

الرزق من عند الولي مسقي النبت

ولا تقول وحدي وقتنا ما صفا لي

كل يقول اني من الوقت ما طبت