تكفون ردوا للعقول الحكيمة
تكفون يااهل العرف تكفون يا عيال
لا تفرحون لبعضكم بالهزيمة
ولا تلبسون القول والقيل سربال
لا تضحكون من اليدين الكريمة
ولا تشمتون بناقص الحال والمال
عبر السنين المقبلة والقديمة
المال نصف انسان والفقر رجال
ليه الحكيم اليوم عمه غريمة
وبقلب ابوه الفين ساهج وولوال
وين اكمل العادات وين الحشيمة
طاحت رقاب العز بسيوف الاذلال
ابوانكم ما يقبلون الظليمة
وانتم لكم بالظلم مورد ومدهال
يوم الليالي مغبرات وعتيمة
ما في وفا ابوانكم شك وجدال
ويوم امطرت في كل بيتين غيمة
صرتوا ضواري بس في شر الافعال
يا حيف جمعاكم تحول هضيمة
يا حيف فرقاكم بنت فيكم جبال
والله ما للروح بالجسم قيمه
داموا عيال العم فتنة وغربال
تكفون ردوا للحياة السليمة
الجهل يجرح والتشتات قتال
