تعبت اجامل يا زمان التعايس
وتعبت اجيب لكل نشاد تصريف
وتعبت في رجوى الحظوظ النحايس
وتعبت من ذب الرجوم المشاريف
علي في مخلابه الوقت دايس
رحماك يا منشي المزون المراديف
جار الزمان وعاونوه الخسايس
جاير وعوانه شفاح وملاقيف
فيه الثعل خلف وراه الفرايس
والذيب عايش فيه عيشة تناتيف
وان قلت خفف يا زمان النكايس
قال انت توك جيت تبغى المحاريف
هو ما درى اني عفت طلع الغرايس
والمركب العايم بليا مجاديف
وابلغت للنجوى ورود الرسايس
اللي لعربون السعادة ملاهيف
وابلغت حتى لابسين الدرايس
شعث الملامح فاقدين التصاريف
هذا وانا ما عشت عيشة لحايس
مرفوع راس ولو لحقني تخاليف
مليت ليل به سكون وحسايس
لي حاجة ما بين لوزان وجنيف
ما قصدي ادور هناك الونايس
اصل الوناسة من شفا نجد للسيف
