|
| الريـاضيـة
جوال: عيدك مبارك يا مجول.
مجول: علينا وعليك وعلى كل المسلمين.
جوال: عساك معيد في الرياض؟
مجول: انت تكلمني يا خوك وانا ماسك خط وانا قرب الميدان الجديد.
جوال: هاه بشر عسى مبانيه في مراحلها الأخيرة؟
مجول: خلني ادربل عليه كودي اشوف السيدة.
جوال: وش معنى السيدة يا مجول؟
مجول: يقولون كان اللي بيأخرهم ما غير السيدة وإلا المباني والمنصة اشوفها تلق .
جوال: إلا على طاري الميدان الجديد الربع بنو اسطبلاتهم الجديدة؟
مجول: ماطرى على بالهم؟
جوال: ما ينلامون الاسعار اللي وضعها النادي تقص ظهر الملاك الصغار.
مجول: بس تراهم هم اللي وافقوا على ها الأسعار يوم اجتمعوا على تحديد المتر لميدان الجنادرية.
جوال: اجل ما لهم الا يتقاطون؟
مجول: قصدك كل مجموعة تشارك في اسطبل.
جوال: مفروض النادي يعيد النظر في سعر المتر للاسطبلات الجديدة.
مجول: ابشر بالخير المسؤولين ما هم مقصرين وبتسمع اخبار تسر الخاطر؟
جوال: ولا تنسى مزارع الانتاج بالجنادرية واحتياجاتها الضرورية.
مجول: الله يطول في عمر من سعى فيها.
جوال: لا والمزاد على الأبواب وكل الأمور بتزين.
مجول: ما دامك طريت المزاد يقولون اللجنة سافرت في رمضان.
جوال: قصدك لجنة المزاد.
مجول: اجل لجنة مزاد كيفلاند.
جوال: الا كتيب المزاد عساهم وزعوه على جيرانّا.
مجول: يقول عاطف بيسافر بكره.
جوال: وتوك تقول اللجنة سافرت في رمضان.
مجول: يحبك للهذرة.
جوال: على اسمي.
مجول: الا وش علوم الخيل واسطبلات الملز؟
جوال: يقولون الطيارات تشيل وتحط.
مجول: عساها رمك وافراس؟
جوال: اجل خيل كيسان كبار,, كبر مخك يا مجول.
مجول: بيعات,, صفقات.
جوال: قبل العيد,, والا بعده؟
مجول: اللي يسمع كلامك يشوف سوق الخيل مثل سوق الأسهم ها الأيام.
جوال: يتحرك ان شاء الله وبيكثرون الشرايه في المزاد الجاي.
مجول: الا قريت قائمة دوري الانتاج والمستورد.
جوال: لا بس ذاكرها.
مجول: وش ابرز ما تذكره؟
جوال: ابطالها واللي بتصدرون هرمها.
مجول: وغيرها.
جوال: التنافس مدهر في وصافة دوري المستورد.
مجول: قديمة.
جوال: اجل الأزرق يغازل دوري الانتاج للموسم الثالث على التوالي.
مجول: عوايده,, غيرها.
جوال: اشغلتني ما عندي الا اللي قلتلك.
مجول: اجل عندك دوري الانتاج انخله ولا انتهى الموسم يا حنا بنقول الي ما انقال.
مع تحيات جوال ومجول
|
|
|
|
|
