عقب فرقا حبيبي ضاق صدري خاطري ملهود
تصبحني همومي والمساء شوقه يمسيني
واهج من النهار ازبن ظلامك يا الليال السود
ادور به ونس وادور اللي به يسليني
ويحل الليل وافكاري تحاوم والعذاب يزود
واحس الحزن في يومي وفي ليلي مخاويني
وله شوقي نهر جاري وله حبل الوفا ممدود
وعلى درب الخيال القاه والا هو يلاقيني
واليامني ظميت اشرب من الماء صافيات عدود
ورويتك يا القراح العذب والمظمين مظميني
وعقب فرقاه عشت بغربة شره بليا حدود
ولا ادري وين دربي لا طرى شوقه يوديني
ياليته يوم قفت خطوته راحت جفا وصدود
وياليته يوم واجهته لطيف الروح جافيني
وياليت البال خالي ما سكنته يا نعيم العود
وياليتك من دروب الحب بالمجمول معفيني
