ليه الهجر تذكر لي اليوم طاريه

لا تذكره لو كنت للبعد ناوي

بعض الكلام يعل قلبي ويدميه

واخذ معه سجّات كني خلاوي

واتصوره واغيب عن واقعي فيه

واخفي دموعي يا حياة الشقاوي

يوم انتصف دربي ألا كيف تنهيه

ما يصير ترحل عن حياتي نحاوي

وش لون تترك صاحبك ثم ترديه

في غبّة الأحزان من فوق هاوي

ما ظن تقدر صادق الحب تخفيه

لو كان طبعك بالمشاعر حياوي

أدري بقلبك ما رجى غير مغليه

بصدق الوفا ما تدعيها دعاوي

علمتني كيف ابدع القاف وابنيه

وعلمتني معنى الهوى للهواوي

أنا معك وان طوّل الدرب لامشيه

ما دام دربك ما تحيد الخطاوي

بسّ العذاب وقاسي الهرج ما ابيه

لا تروح لحظات الهنا بالهقاوي

أنت لخفوقي مطلبه وأنت أمانيه

يا غاية الأحلام واسمى المناوي

بعيش أنا هالحلم وأرجي حراويه

وباقي احلومي ما عليها حراوي