ساق السحاب وساق قلبي مساقه
المدلهم اللي قنوفه مدانيق
وان ساق قلب سوق الأيام ساقه
يعلم به الخلاق رب المخاليق
واللي يكن القلب يصعب نطاقه
عليه بيبان الضماير مغاليق
وصبر بدون حدود مر مذاقه
وهم يخرق سترة الجوف تخريق
ولا احد نشدني قلت مالك علاقه
ويجرح شعوري هرج بعض المطافيق
ناس بعضهم ما يصون الصداقة
اقلال المروه مخلفين المواثيق
أحد وراء المقفين قطاع ساقه
واحد يسوي في صديقه تعاليق
واحد عشق نقل النمايم عشاقه
واحد يفرق جمع الأجواد تفريق
واحد على غشه يغطي نفاقه
ويطبق طبوعه على الناس تطبيق
واليا تهرج يجيك بلباقه
وينسق إخلاصه على كل تنسيق
أعمى بصيره واعتنقها طفاقه
ويركض على الغفلات ويصد ويويق
ناكر جميل ومن وثق فيه باقه
ما للثقة عند المنافق تحاقيق
مثل السراب الي يجول اصطفاقه
وتكشف خفا خافيه لا نشف الريق
يغري نظير العين لمعة براقه
وقت الرخا واليا حصل لك تعاويق
واليا بداك النوب صد وتصاقه
وبعد الرخا حدك زمانك على الضيق
ياخذ صعوبات الأمور برواقه
الله يطوق فوقه الذنب تطويق
