تدفقي يافجوج الله من الزايرين
ارض الحرم تنتظر بالحب زوارها
ياكثر ماتحمل احضان الوطن من حنين
لضيوف بيت الكريم وضجة اذكارها
وياطهر قاع مشوا من فوقه المسلمين
ينبت بركات تجنى دايم اثمارها
لاجوا ملبين للرحمن وموحدين
تشوف معنى الاخوة باصدق شعارها
بالعفو واللطف والغفران مستبشرين
تسوقهم نشوة التوبه وتبشارها
في موقف يهتدي له كل قلب فطين
محجوب عن لفحة النيران و اشرارها
بقدومهم يسفهل الخاطر ويستكين
وتعتز بيض النفوس وتسعد اسرارها
يامرحبا قدّ فرحتنا بهم اجمعين
ترحيبة مالقيت وصوف مقدارها
تحية المخلصين بجية الصالحين
فيها من انسام نجد ونفحة ازهارها
ارضي كريمه ومنها قدوة الاكرمين
ورجالها بالمكارم تشتعل نارها
حماية الدين خدام الحرم والعرين
وعز وملاذ واسود تافي اشبارها
من جودهم وسعوا مشارف المسجدين
وبنوا مشاريع خير منعم جارها
في راحة ضيوف بيت المعتلي عاملين
سنة شيوخ تسن وورث لاخيارها
بافعالهم نفخر وبامجادهم عايشين
وفي عدلهم تستريح النفس وافكارها
