«غطى الحزن دنياي»
رحماك يا غافر خطايا العبادي
امنت بك ما غيرك احد عبدناه
القلب جدت به جروح جدادي
هلت دموعي بعد منهو فقدناه
في ليلة جت بالحزن والنكادي
غطى الحزن دنياي من بعد فرقاه
كني بليل الحزن يابوي غادي
اقوى عذابه بالشقا جاء من اقصاه
يا بوي صار الكون بعدك سوادي
ليل كسا حزنه لشوفي وغطاه
يا بوي عقبك حزن الايام زادي
اشرب عذاب الهم بالجرح واكماه
ليت المنايا طولن بالبعادي
والا خذاني الموت قبله وخلاه
مرحوم ياراع الكرم والمبادي
مرحوم يا اللي طيب الفعل مسعاه
دفنت جثمانه بغرب البلادي
جنب الشعيب اغلا البشر قد دفناه
في ديرة جعل السحاب بركادي
يسقي ثراها بارق الغيث من ماه
عساه في جنات عدن برادي
اطلب رفيع الشان له واترجاه
