قولوا لمطلق ولم البن والهيل
ترى الجماعه روسها موجعتها
نبي نسير يمكم يا رجاجيل
يصاحبنا اللي نفخر بمعرفتها
اليوم زل البرد واستعذب الليل
والناس جمعات الربيع اجمعتها
والارض من فضل الولي عمها السيل
من شهر سبعة والخباري تحتها
من شرقي النايع الى وادي الخيل
ريضان وازهار النفل كاسيتها
هذا الجمال اللي ورد بالتماثيل
في هالدعوب اللي تميل زهرتها
روض تشكله النباتات تشكيل
لاجاب نسناس العشي رايحتها
وطيورها ترسل غناها مراسيل
تبعد هجوس طالما جمّعتها
هذي طراة الوقت. ود.. وتعاليل
وسوالف بعض البشر ما روتها
ما تسمع الا صوت صب الفناجيل
ويدين راع الكيف لا ناولتها
يالله عسى الدنيا عليهم تساهيل
وتعينهم على الحياة وعنتها
وعسى بلدهم تصطفيه المخاييل
وتنثر عليه حموله اللي حوتها
