يا فاكس وصلها لصفحة مدارات
وام الجرايد كلهن الجزيرة
ارسالة تحمل سلام وتحيات
من شاعر غنى وحكم ضميره
غنى من الاعماق له عشرة أبيات
غالي ثمنهن والمعاني كبيره
يااهل الصحف ومحررين المجلات
الشعر في حاله تراها خطيره
نشوف فيه اجحاف ونشوف هفوات
مالت موازينه وحاسوا مريره
تراثنا الشعبي بكل المجالات
منها يعد امجاد صقر الجزيره
ومنها قصيد بالوطن له بصمات
قول على فعل يذعذع عبيره
هذي تراها من كبار المهمات
يااللي عيونك للمهمة بصيره
اسمع كلام ما دخل فيه شكات
ابختصرها والطويله قصيره
كم واحد شعره مخلد وهو مات
فيه الحكم والا فوايد كثيره
يا حسنة تمحى لها عشر سيات
تسوى ثلاثين الف مليون ليره
ما فيه مشروع نجح بالدعايات
لو الدعايه تعتبر له بريره
واختامها على النبي الصلوات
عداد وبل المزن في كل ديره
