العلم ما يدرك بغير التجاريب

ولا تدركه خير العقول اللبيبه

والناس فيهم مخطي الدرب ومصيب

رجل عضيد ورجل ما ينغري به

ورجل يجي بعد الثريا عن العيب

ورجل ردي ما يعرف الا بعيبه

ورجل كلامه ما يجي به شواذيب

ورجل على راسه كلامه مصيبه

ورجل نزيه القصد والفعل والجيب

ورجل يفوح العيب من شق جيبه

وللطيب ناس ما لهم عنه تجنيب

وكل يطول من العلا قدر طيبه

ومن لا سعى بالفعل ما يدرك الطيب

ومن لا عنا له بالمنى ما يجيبه

ومن زاد طيبه كن عنه العذاريب

ومن زل عن طيبه تردى نصيبه

ومن لا يحوشه قبل ما ياصل الشيب

ما ينفعه طيبه عقب كثر شيبه

ومن عاش بالدنيا يشوف الاعاجيب

ويشوف دورات الزمان العجيبه