لا يازماني ذبل عمري وهو دوبه

بأول شبابه وبأول درب الاحلامي

ونهر المشاعر نضب والروح مسلوبه

واثر التجافي لعرش الحب هدامي

لاخيم الليل نار الشوق مشبوبه

قامت توقد حطبها جرحي الدامي

وش عاد لو تل قلبي رمش رعبوبه

واقفت تمايل وخلت للمساء هيامي

من لا التفت صوبنا ما نلتفت صوبه

ولو نلتفت يشرهون اخوال واعمامي

وان كان شحت على هالخطوة دروبه

ماهو نهاية مطاف العمر يا اقدامي

ومن لاشرب من يمينه صار عذروبه

لو يرتوي يوم يظمأ باقي العامي

والمشرب اللي قراح وكله عذوبه

لا من وصلته تبي تروابه ايامي