هيه ياوقتي وتاليها معاك
كل ماقلت اعتدلت تميل ثاني
هيه ياوقتي علامك وش بلاك
وش تبي مني ترى ماجا كفاني
ياكثر مرك وياقلة حلاك
جملة دايم يرددها لساني
تركض سنين العمر ترجي رضاك
وانت طبعك ماتغير يازماني
بالحزن تمشي ثقيلات اخطاك
وبالفرح عمرك مثل عمر الثواني
صرت اعرفك زين لو نور سماك
لو غدا بدرك بدر سبع وثماني
صرت اعرفك زين لوبين صفاك
لو ضحكت وقلت لي حلو الاماني
لو صفيت وصرت لي مثل الملاك
وجهك الآخر يجي وقت ويباني
ما اسرعك تندار وتبين جفاك
والسعاده مالها عندك ضماني
رحت ابسلى عند هذا وعند ذاك
واثر كل راح من وقته يعاني
اصبري يانفس والدنيا هلاك
كل مافيها سوى المعبود فاني
