الجبل ما صاح من ثقل الحصاه
والعنب ماكل واحد ياصله
الحياه اللي كذا.. ماهي حياه
والكلام ان زاد يصبح مهزله
كل واحد لو يجيب اللي وراه
مالقينا للعذر من يقبله
وانت ياللي ذاب قلبي من غلاه
كم قسى قلبك علي واتحمله
من عطاك القلب مايبغى جزاه
والله انه جاك لو ماتقبله
لاترده بس لاتبحث خفاه
لاتزيده شوق فيك وتهمله
انت داه وعلته وانته دواه
لو تبي تحييه و لا تقتله
اه من قلبي ومن هم وزاه
مل مشواره عساه يكمله
شاف من جور الزمن شي دهاه
الزمان اللي حداه وبهذله
والصديق اللي تبدل عن وفاه
ماهقيت ان الزمان يبدله
كيف ينسى وقفة اللي مانساه
كيف عن باله نسى اني من هله
باعني وشلون باع اللي شراه
مانقص من جور وقتي كمله
لايظن اني بعدها في حراه
الله اللي يمهله مايهمله
كان قلبي بعد هذي مارماه
والله اني لاستويله واقتله
