أنشدك عن رجلٍ فعوله عظيمات

فيما مضى واليوم جاله بدايل

ياما حصل له ماضي الوقت صولات

واليوم لولا الشرع ماله فعايل

هذاك له في بيرق العز رسمات

رفرف به الأخضر.. على كل طايل

مافيه شك.. المعني.. السيف بالذات

ياما قطع..بالشرع.. من راس مايل

الشاعر اللي صاغ جزلات الأبيات

يامرحبابه عد نبت المسايل

اللغز واضح ما يبي زود نظرات

)السيف( بالماضي يسوي الهوايل

دام الطريقي جاب زينات الأبيات

أقول لغزك يابن الأجواد هايل

والسيف تطلع قيمته بعض الأوقات

وقت القصاص ووقت حسم المسايل

ياللي نضمت اللغز هيهات هيهات

عصره مضى مع عصر قب الأصايل

ياعظم شأن السيف والسيف مامات

شعار دولتنا وعز القبايل

لغز الطريقي يوم نظم فالابيات

ذكرني أيام السنين الأوايل

السيف جاله ماضي الوقت جولات

كم راس شيخٍ طاح بين الأصايل

الله يبارك في رجال المهمات

آل السعود مطوعة كل عايل

ترى سيوف اخوان نورة صقيلات

مسلولةٍ للي عن الحق مايل

الحمد للمعبود رب السموات

والشكر لله ثم لراع الفعايل

عبدالعزيز موحدٍ كل الاشتات

بالسيف وحد شعوب وقبايل

اللغز وافي والمعاني جميلات

والوقت الاول فات ماله مثايل

السيف حل اللغز والسيف مامات

وفعله بشرع الله كبير الدلايل

لغز الطريقي طارقه عشر مرات

لين اعتدل ثم انحنى للمثايل

السيف حل اللغز واللي مضى مات

له في عصور ماضيات هوايل

السيف له رجلٍ ثقيلٍ وحزات

في ماقفٍ فيه الأوادم تخايل

يشتال روسٍ يفعلن الخطيات

أمرٍ من المعبود فيه الدلايل

يامرسل الالغاز نظمت الابيات

نطقك على معناك ماله بدايل

هرجك صحيحٍ والمعاني مهمات

سيفٍ بكف الرجل فوق الأصايل

ياللي كتبت اللغز في عدة أبيات

أنا أشهد انك من رجال الحمايل

ولغزك عرفته من قريته بلحظات

هذاك هو السيف فوق الأصايل

ياأهل التراث اللغز للنفس مشهاة

الحل عندي مايبي له دلايل

السيف هو حله ولابه مراواة

يقوله اللي ساكنٍ وسط حايل

يامرحبا يا كاتب اللغز مرات

اعداد ماهلت مزونٍ همايل

السيف يذكر في العصور القديمات

واليوم ماله ذكر مع كل قايل

لغز الطريقي فيه حكمه وعبرات

واللغز حله جاك يابن الحمايل

والله يديم الشرع في كل الاوقات

اللي حكم )بالسيف( كل القبايل

لغزٍ قريته والمعاني لطيفات

وشكرت رب الخلق راع الجزايل

اللي جمعنا بالرخاء والمسرات

وشعارنا نخله وحدبٍ صلايل

السيف حل اللغز والسيف ما مات

السيف باقي له عظيم الدلايل

به ينشر الإسلام وقت مضى وفات

وبه شيخ نجد أحد جموع القبايل

عبر الاثير أبعث سلام وتحيات

لأهل التراث ومهتوين المثايل

واللغز حله«سيف» مابه مراواة

فيما مضى له مع معزي فعايل

قريت لغزك يالطريقي بالابيات

لغزك ثمين ولا مثيله مثايل

الحل سيف وبالدهر له علامات

في ماضي وقته مع أهل الاصايل

الخيل واجد بس تبقى الأصيلات

سوابق تظهر بيدها وأصايل

مركاضها ضرب السيوف الرهيفات

تبقى أساس وكل تقليد زايل

عبدالكريم أرسل بيوتٍ جديدات

لغزٍ يبى حله بزين المثايل

«السيف» بالماضي جرى له بطولات

من فعل حده أحمر الدم سايل

السيف في وقته يسد الهمات

سمي خوي الجنب وافي الخصايل

ابن الوطن يفيد في كل الاوقات

علم بلدنا من خيار الدلايل

عبدالحكيم أرسل ويبغى إجابات

يامرحبا واهلين يا ابن الحمايل

في ما مضى للسيف صوله وجولات

مع الفوارس في ظهور الأصايل

يا ما حلا صفحة تراث ومدارات

فيهن نشوف ابداع ماله مثايل

واللغز حله «سيف» مافيه شكات

وعندى على قولي شهود ودلايل

يامرحبا ترحيبه كبر أبانات

واللغز وافي في جميع الخصايل

ولا زمان فيه صوله وجولات

والحل سيفٍ رادع كل عايل

الله يعز أهل الوفا والشهامات

بحكم الشريعة طوعوا كل عايل

آل السعود.. مروضين الصعيبات

وكم واحدٍ راسه من السيف مايل

ياللي كتبت اللغز في جملة ابيات

اللغز حله واضح له دلايل

السيف الابتر له مواقف وحزات

يشهد على فعله شيوخ القبايل

بعد السلام وبعد رد التحيات

أقول يا أصحاب الحكم والمثايل

السيف حل اللغز والسيف بالذات

هو منعة الفرسان فوق الاصايل

السيف هو رمز الوطن والبطولات

يحمله بيرقنا ورسمه تمايل

الفيصل البتار وقت المهمات

في وجه من ينوي الرداء والتحايل

سبحان رب الناس رب السموات

اللي خلق في الخلق عاقل ومايل

السيف له ياكاتب اللغز حزات

يردع مخاليق تسوي الهوايل

الله لا يذكر زمان مضى فات

فيه الجهل والظلم عم القبايل

كم واحد بالسيف وقت الجهل مات

وكم واحد بالسيف سوى الهوايل

يوم الطريقي سجل اللغز بأبيات

شاعر وبالألغاز صاغ المثايل

شاعر ويفهم بدع الألغاز بالذات

والسيف حل اللغز يابن الحمايل

يا مبدعٍ بالشعر من زين الابيات

ياللي كلامه يحتفظ به مثايل

لغزك يقول الحق من كل الاصوات

سيف شديد معدلٍ كل مايل

على علمنا السيف والسيف ما مات

والسيف حفظ العدل عن كل مايل

هذا جوابي وأرسله للمدارات

والسيف باقي مع عموم البدايل

الف السلام نقول وازكا التحيات

للي كتب لغزٍ به الوصف هايل

ياصاحبي قولك بدابه علامات

كم معتد دمه من السيف سايل

يابو علي سلام وازكى التحيات

لغزك وصلنا واستلملك دلايل

السيف له صولات وايضا بطولات

وبالشرع يقمع به ترى كل عايل

سلام يامن لغزه اصبح ولابات

لغزه جميل وقايله بو الجمايل

مارد كيد أهل القلوب العصيات

إلا السيوف الباترات الهوايل

حنا عيال اليوم واللي مضى فات

تاريخنا يحكي وباقي دلايل

السيف في الإسلام سوى علامات

تشهد على فعله جميع القبايل

أبيات لغزك يالسنافي جميلات

وأنا أشهد إنه عدل ماهو بمايل

السيف هو حله ولابه مراواة

فيما مضى له صيت بين القبايل

عبد الحكيم أرسل بيوتٍ سليمات

أبيات شعرٍ ما بهن بيت مايل

راض بفكرى للسنين القديمات

عصرٍ مضى للسيف فوق الأصايل

حي الغلا.. حي الوفا.. حي الأبيات

حي الشعور.. وحي شرد المثايل

وقتٍ مضى للسيف صولة وجولات

يوم النضا تعسف.. وقب الأصايل