لو المدح يوفيك حقك مدحناك
لكن عساها في موازين الاعمال
نفسك تجود وتبذل الجود يمناك
وتشيل حمل ما يشيلنه جبال
يشهد لك اللي تكرمه يوم ينصاك
ويشهد لك التاريخ في زين الأفعال
الطيب ساس للرجاجيل شرواك
والطيب ما نلقاه في كل رجال
ليا حل طريا أهل الكرم حل طرياك
من زود طيبك ضربوا فيك الأمثال
فارس ولد فارس بالعز مرباك
كريم الأصل ومن عريبين الأخوال
فيصل بن خالد على الخير مبداك
يا صانع المعروف يفدوك الأنذال
لبيت صوت اللي من الضيم ناداك
أم حنون وتذرف الدمع همال
أم السبيعي تدعي الرب يرعاك
يا اللي من أجل وليدها سقت الأموال
أنقذت نفس من على حد الإهلاك
فعل عظيم وتذكره كل الأجيال
يا دافع المليون بالخير يجزاك
يجزاك ربي عنه يا طيب الفال
زان الشعر يوم اني اوصف حلاياك
ولونه بغيرك ما تمنيت ينقال
