كلما قمت تجرح صادق الحب زاد
والغرام الحقيقي والوفا لك يزيد
لا تحسب ان جرحك له سبب بالبعاد
انت جرحك يطفي نار شوقٍ وقيد
ما اقدر انسا لو إنا عن بعضنا بعاد
كل حبٍ يبيد وحبنا ما يبيد
لو تطول الليالي والهجر والعناد
كل يومٍ أحس إنا بغرامٍ جديد
لا هجرت القصايد نادر الشعر عاد
مصدر إلهامي انتي في بيوت القصيد
شمعةٍ في ظلامي غايةٍ في مراد
خلك اللي بتعذيبك وجرحك سعيد
حبك اللي مرافقني وانا بالمهاد
ما أقدر انساه لوني وسط قبري وحيد
وحبك اللي تربع في ربوع الفؤاد
كن حبك بدمي ساريٍ بالوريد
راضيٍ في غرامك لو يطول السهاد
هاويٍ ما يجي منكم مضر ومفيد
يا هلا فيك وبجرحٍ سهومه شداد
بس لو هن شدادٍ حيل قلبي شديد
صدّقي لو أقول ابغى جروح جداد
جرحك يقربك مني لو إنك بعيد
