قصة حياتي تذكر الحي والميت
ومن مال حظه مارقى الطايلات
عشت الشقى واليتم من يوم ماجيت
ومن المصايب زاهده في حياتي
ياما على صكات بقعا تمشيت
سود الليالي أيامهن قاسيات
واشيل همٍ كل ما صبحت وامسيت
والشاهد الله عالم الخافيات
كم ليلةٍ في مرقب الذيب عديت
الليل ظلما والقدم حافيات
واقفت ليالينا وعن الماضي اقفيت
وارجي الكريم مدبر الكاينات
ارجي ثمر غرس على الروح بديت
قولٍ وكاد وبين له ثبات
كم زلةٍ باتت وعنها تغاضيت
ومن شانهم ما نستمع للشمات
ورزقي على اللي فارضٍ حجة البيت
رازق دواب الأرض حدر الصفاة
رب كريم يرحم الحي والميت
ويعطف على اللي كاتبٍ له حياة
أرجيه يغفر زلتي كل ما اخطيت
ويعوظني بأيامنا المقبلات
وختامها على أشرف الخلق صليت
واعداد ما يسقي المطر من نبات
